КОЦУР – У римокатолїцкей церкви Шицки святи у Коцуре внєдзелю, 2. априла, преславена Квитна нєдзеля по григориянским календаре.
Службу Божу служел управитель вербаскей и коцурскей римокатолїцкей парохиї о. Кароль Сабадї. Служба Божа почала зоз Евангелию о уходзе Исуса Христа до Єрусалиму, а потим служена стандардна Служба, на мадярским и горватским язику. У казанї о. Сабадї бешедовал о радосци народу котри дочекал Исуса Христа зоз палмами, а ми го дочекуєме символично з банїтками.
За означованє Квитней нєдзелї багнїтки порихтали члени Церковного одбору коцурскей римокатолїцкей церкви, а з тей нагоди значно помогла и фамелия Мезеї.
Пред законченьом Служби Божей, о. Кароль Сабадї пошвецел багнїтки, а вирни их могли вжац и однєсц до своїх домох, лєбо на гроби своїх покойних, як то звичай на тото швето.
Церква того дня була полна, а на Служби Божей присуствовали числени вирни, од наймладших по найстарших, и шицких виросповиданьох.
