КУЛА/КРУЩИЧ – Вирни Грекокатолїцкей парохиї священомученїка Йосафата у Кули и єй филияли у Крущичу, у вельким чишлє, внєдзелю 12. априла преславели Перши дзень Воскресеня Христового – Вельку ноц.
Як то звичай у тей парохиї, перша Пасхална утриня и Пасхална св. Литурґия зоз пошвецаньом кошаркох була на 5 годзин, а Пасхална Служба Божа зоз пошвецаньом кошаркох була и на 10 годзин. Богослуженя служел капелан о. Платон Салак ЧСВВ, док у Крущичу св. Литурґию и пошвецанє паскох, служел парох о. Дамян Кича ЧСВВ.
Место казанї на шицких службох пречитана владикова Вельконоцна винчованка на руским и українским язику. На други дзень Пасхи по Служби Божей дополадня було мированє и традицийни Вельконоцни концерт хтори пририхтали члени домашнього КУД „Иван Сенюк”.