НОВИ САД – У року шейдзешатрочнїци обновеного виходзеня часописа „Шветлосц”, тих дньох вишло веб-виданє и трецого тогорочного числа нашого найстаршого часописа за науку, литературу, културу и уметносц „Шветлосц”.
Число отвера блок ориґиналних наукових прилогох, медзи котрима робота мср Милоша Лекича „Општински виберанки у Руским Керестуре 1927. року”, мср Мирослава Кевеждия „Чи єст мира за шиви пчоли?” и робота мср Зинаиди Будински „Карпатизми у лексики руского язика у Войводини: ареална анализа вибраних лексемох”.
З чечуцей литературней продукциї обявени циклус писньох Михаели Еделински „У мено єшенї” и проза Владимира Кочиша „Пирня”.
У рубрики „З литератури Бошнякох у Сербиї” представени поет Харис Плойович, чийо шейсц писнї прешпивала Олена Планчак-Сакач.
Рубрика „Етнолоґия – етноґрафия” приноши прилог Ивана Лїкара „Народни шпиванки (I)”, док у рубрики „Рочнїци – ювилеї” обявена статя Ирини Гарди-Ковачевич „Ветеран медзи подобовима уметнїками”, з котру часопис означує 85-рочнїцу од народзеня Силвестера Д. Макая.
Рубрика „Статї и есеї” приноши огляднуце на Медзинародну науково-практичну конференцию „Особа у образовно-културним просторе: Микола Мушинка (1936–2024)”, котра нєдавно отримана у Ужгородзе, а о котрей пише Дюра Латяк.
„Прикази, критики, рецензиї” информую о новей кнїжки Павла Роберта Маґочия „Од нїодкадз по даґдзе: сучасна история карпато-русинского руху” и Олени Планчак-Сакач „Итака од хмарох”, о котрих пишу Любомир Медєши и Зденка Валент Белич.
„Драмски додаток” приноши дуодраму Катарини Фейди „Корона и ми”.
Остатнї прилог у часопису „Упутство за пририхтованє рукописох за друкованє”, з котрим Редакция поволує на сотруднїцтво през писанє ориґиналних наукових и фахових роботох з обласци гуманистичних и дружтвених наукох.
Число илустроване з рисунками Яни Варґа.
И тото число часописа „Шветлосц”, як и шицки дотерашнї, годно опатриц на адреси: www.ruskeslovo.com/шветлосц.