Звонимир Павлович

Zvone za knjiguЗВОНИМИР ПАВЛОВИЧ народзени 15. юлия 1955. року у Руским Керестуре. Основну школу и ґимназию закончел у Новим Садзе, дзе и абсолвовал историю на Филозофским факултету. Початком 70-тих рокох сотрудзує з численима младежскима часописами, а 80-тих периодично обявює тексти на сербским и руским язику, як у дньових новинох и часописох („Ґлас омладине”, МАК, „Руске слово”, „Дневник”, „Поља”, „Војводина”, „Шветлосц” и др.)

Инспировани з дїлами Бруна Шулца и братох Чапек, 1986. року пише драмски нарис котри постава основа за представу „Инсекти”, котру и режирал за тедишнї АРТ „Дядя”, Сцена Нови Сад. Почина роботу и на авторским мултимедиялним проєкту „Авзлоґ”. Формує алтернативну театралну трупу „Форґов”. У сотруднїцтве з Културним центром Нови Сад и Здруженьом драмских уметнїкох Войводини наступа на значних фестивалох у Заґребе, Кули, Осєку, Панчеве, Подґорици, Бару и „Ґраду театру” у Будви.

Идуцого року, по мотивох з дїлох Томаса Мана, пише драмски текст и режира „Забранєну репродукцию” за новосадску сцену АРТ „Дядя”, же би 1992. року, адаптовану верзию того тексту, на сербским язику, премиєрно виведол у Зренянину у продукциї Драмскей роботнї „Центер”.

За потреби Драми Сербского народного театра з Нового Саду, Павлович 1988. року пише драмски текст за дзеци на сербским язику, „Гусарска бајка”, котру источасно и режира на тей углядней сцени. Представа достава добри театрални критики, а СНТ виведол вецей як трицец успишни репризи на Малей сцени у Новим Садзе и околних местох.

Павлович режирал коло двацец театрални представи и перформанси, на руским и сербским язику. Ношитель є значних покраїнских припознаньох и наградох за ґлуму и режию у Панчеве и Мостаре.

Концом 90-тих рокох започина сотруднїцтво зоз Телевизию Нови Сад, Редакцию на руским язику и подписує даскельо ТВ сценария гумористично-бавеней структури, од котрих ше видвоюю „Карчма на концу швета” (1998. року) и „Казабланка” (2002. року).

У рамикох порядней дїялносци РКПД з Нового Саду, Звонимир Павлович порушал даскельо замерковани програми и панел-трибини з обласци актуалнох збуваньох у рускей култури, як цо то „Стретнуца” и „Под смужку”.

Автор є Фестивала дзецинскей творчосци Руснацох Войводини „Веселинка” котри од 2002. року реализує у сотруднїцтве зоз Руским културним центром у Новим Садзе.