ЖАБЕЛЬ – После вецей як мешац спортского возбудзеня и нєизвесносци, през викенд за нами, внєдзелю, 2. авґуста закончени ище єден успишно орґанизовани 37. Турнир у малим фодбалу Жабель 2026.
Тогорочни Турнир у малим фодбалу Жабель 2026, мал нови рекорд у штирох возростних ґрупох (сениоре, веретанє, пионире и кадети) бавели аж 65 екипи и одбавени 103 стретнуца.
У ґрупи сениорох, перше место завжала екипа „Еко пет 021” зоз Нового Саду, котра у финалу победзела екипу „Lemitesteriht” 1:0, a треце место завжала екипа „Мирко фасада” зоз Дюрдьова котра после пеналох була успишнєйша як екипа „ПҐ Баяц” 6:4.
У ґрупи ветеранох найлєпша була екипа „Ґабйба або два” зоз Жаблю, друге место завжала екипа „Соколови”, а треце место припадло екипи „Аутосервис Мики” после побиди екипи „Бачка Дюрдьов” зоз 3:1.
У конкуренциї пионирох найлєпша була екипа „Фасада” зоз Дюрдьова котра после пеналох звладала екипу „Lemitesteriht” 3:2, док треце место завжала екипа „Жемово роботи Плачкич” котра победзела екипу „Djurdjevo city” зоз 2:0.
При кадетох шампионски погар достала екипа „Bozej city JKP Vodovod” котра у финалу була лєпша як екипа „Still security” з резултатом 4:2. Треце место завжала екипа „Калайджия транспорт”.
Финални вечар бул як и вше спектакуларни зоз окремним ошвиценьом, факлями и огньометом по законченю стретнуцох. Того вечара уручени погари, медалї и подзекованя найлєпшим екипом, а зоз диплому, припознаньом и погаром наградзени поєдинци, найлєпши бавяч, стрилец, ґолман, фер-плей бавяч и фер-плей екипа у шицких катеґорийох. Наградзени и навияч турнира, найстарши ветеран и наймладша екипа. Зоз Дюрдьова два дипломи, за найлєпшого бавяча и стрилца, у ґрупи сениорох достал фодбалер зоз ФК „Бачки 1923”, Виктор Дундєрин котри на турниру бавел за екипу „Фасада” зоз Дюрдьова.
Наградни фонд за завжате перше, друге и треце место на турниру за сениорох/ветеранох бул: перше место 650.000/100.000 динари, за друге место 70.000/10.000 динари и за треце место 50.000/20.000 динари. Турнир орґанизовани под покровительством Општини Жабель, у сотруднїцтве зоз Спортским союзом општини Жабель, Фодбалским клубом „ЖСК” Жабель, „Наш радио” и „Апатинска пивара”. Турнир и того року отримани на спортским полиґону у Жаблю, споза будинка Општини Жабель.
