Нєшка, кед мали поднїмателє вше чежше обставаю на тарґовищу, приклад фризерки Душанки Радишич указал же знанє, упартосц и мудре укладанє ключ успишного поднїмательства. Єй приповедка нє лєм о краси и модерних фризурох, алє и о успишним микро бизнису на валалє.
После законченєй штреднєй школи, на напряме – фризерка за женски фризури, Душанка уж на 18 роки почала робиц у фризeрским салону у Новим Садзе. У тей дїялносци є вецей як пол живота, двацец пейц роки, а за тот час здобула практичне искуство, алє и довириє стаємних клиєнтох. Пред тринац роками одлучела викрочиц у поднїмательстве и отворела власни фризерски салон „Спес” у Дюрдьове.
Драга по власни мигель
Єй професийна драга од початку нє була идилична, алє єй дзека и амбициї нє дошлєбодзели же би ше после дзешец рокох роботи и каждодньового путованя на роботу до Нового Саду застановела на тим. Прето, кед уж мала досц искуства и самодовирия, почала укладац до себе и до розвою свойого ремесла. Нє чудне же нєшка стої опрез найкрасшого салону у Дюрдьове, алє и велїх дипломох, сертификатох, припознаньох, погарох и медальох. Здобула их на велїх семинарох и змаганьох, од державних, по балкански, европски, та и шветово, а свою схопносц и знанє унапрямела на правенє контьох.
Врацаме ше на часи кед починала и кед одлучела робиц у своїм салону.
– Почала сом робиц барз млада, и ище вше робим так як и першого дня, з любову. Знала сом цо сцем, та и повем же хто жада и ма сцелосци, треба же би шлїдзел свойо сни. А з искуства повем – кед робиш за другого, маш менєй обовязки, алє и менєй пенєжу, а вецей шлєбодного часу. Док, як приватнїк маш вецей у бутєлару, алє и вецей обовязки, а менєй шлєбодного часу. Нїґда нє може буц шицко идеалне, алє треба чежиц ґу своїм потребом и буц подзековни за гевто цо маш – гварела наша собешеднїца.
Пред трома роками купела хижу на валалє и у нєй отворела салон. Тот поцаг мал директни економски ефект, зменшала фиксни трошки, звекшала сиґурносц дїлованя и оможлївела додатни укладаня до опреми и ентериєру. Кед почала сама робиц, нє була свидома цо то шицко подрозумює. Дзешец роки за простор за свой салон плацела квартелїну и гвари же єй нє було драге, бо кед ше поряднє роби, за таке вше єст. Виєднац приблїжни простор за фризерски салон у Новим Садзе драгше, алє то и оправдане понеже и фризерски услуги у варошу драгши. Медзитим, пред штирома роками власнїк будинка, у котрим бул єй салон, наявел же го о рок звалї. Теди шицки адекватни локали у валалє були видати. На щесце, удало ше єй купиц хижу и у нєй ушориц салон.
– Паметам же зме подписали контракт о купованю хижи на початку фебруара, а у марцу були запровадзени позарядово мири пре корона вирус. После того вирусу шицко було иншаке, а людзе поготов, оцудзели ше. Будовательни материял, як и материял за роботу, у салону були дупло драгши, як пред пандемию. Без огляду на обставини, мушела сом назберац моци и почац преправяц и добудовйовац хижу. Нє побановала сом, алє було напарто.
Од 2022. року робим у власним салону, власним локалу и два раз векшим простору – гварела фризерка Душанка и предлужела же у чаше позарядового стану, пре ширенє вирусу, фризерски салони на початку нє робели цали мешац. Правила у роботи салонох ше дакеди меняли и на дньовим уровню, дакеди було забранєне робиц през викенд, дакеди цали тидзень. Таки стан звекшовал прицисок и при фризерох, алє и при муштерийох.
– Перши пол рока було барз нєсиґурне кеди будземе робиц, а нєстабилносц тирвала цали рок. Нїч зме нє могли плановац. Анї приватно, анї на роботи. Велї свадзби були одказани, бо були забранєни вельки сходи, велї млодята и нєшка гваря же им барз жаль же нє мали свадзбу таку яку сцели. Теди сом барз вельо робела, нє правела сом павзу пре власни финасиї, алє и пре муштериї котри мали свойо потреби и жаданя. Було и поради и компромиси, нє було шицко єдно, и нє любела бим кед би ше врацел тот час – щира фризерка.
Кед словох о цени фризерских услугох, вони подрагшели, алє нє тельо кельо подрагшел репроматериял. Душанка и остатнї даскельо роки уклада до свойого ремесла, едукує ше и змага, а витворело ше єй жаданє – буц на едукациї при познатому фризерови Фарухови Шамуратови зоз Русиї.
Шицки сцу крашнє випатрац
Остатнї даскельо роки Душанка обачела же єст пременки кед слово о власох и випатрунку фризури при женох, а окреме при хлопох. Жени ше баржей стараю о власох, частейше сцу мац красни фризури, а хлопи скорей нє хасновали козметични продукти за допатранє валасох и бради, цо нєшка вецей нє так. Попри тим, Душанка обачела же ознова почали буц популарни байбере котри, попри штриганя власох, ушорюю бради и бритвя их. Хлопски фризере почали провадзиц тренди и зазначовац добри резултати на змаганьох.
– Пред пейцома роками козметика за хлопох анї нє була доступна у нас на тарґовищу, а нєшка вельо векше понуканє козметики за власи, алє и за бради. Обачела сом аж и тото же ше хлопи частейше интересую за трансплантацию власох, скорей то бул луксуз, а нєшка то вельо реалнєйше кед ше дахто за тото одлучи – гвари вона.
Друге место за контю
Душанка успишна фризерка и ма длуге роботне искуство, а пре любов ґу правеню контьох нєдавно одпутовала на шветове змаганє, дзе представяла Сербию и завжала друге место.
На тим змаганю, котре було од 14. до 17. новембра, 2025. року на Малти, под назву Шветови Hair and beauty festival, були 250 змагателє у седем дисциплинох зоз штернац державох, а Душанка представяла Сербию и завжала друге место у правеню елеґантней контї.
– Барз красне чувство буц на тим змаганю, дружели зме ше, вельо того мож видзиц и научиц од квалитетних фризерох. У моєй дисциплини було вецей як 30 змагательох. Тота дисциплина фризурох за млоду найпопуларнєйша. Окреме ми мило же на змаганю було вельо змагательох зоз Сербиї, були зме тим, потримовали зме єдни других, а то и найважнєйше. Одлучела сом ше и нарок змагац у правеню контьох. Плануєм у фебруару пойсц на Реґионалне змаганє до Нишу, пошвидко потим на Европске до Болгарскей, а можебуц и до Мароку на Шветово змаганє – гвари Душанка, свидома же таки резултати и директни маркетинґски ефект хтори прицагує клиєнтох моцня бренд салону, алє и позицию на тарґовищу.
Душанка Радишич указала же и у менших стредкох, як цо Дюрдьов, єст простору за приватни озбильни бизнис. Ключ успиху вше нє лєм єден, то и ремеселнїцки схопносци, мудре розпoлаганє з финансиями и нєпреривне укладанє до знаня.
Позната по гуманосци
У Дюрдьове медзи предняками, кед слово о гуманитарним анґажованю, валачанка Душанка Радишич шицким познатша як Дуда фризерка. Єй самоинициятивне закладанє помогнуц зберац средства за лїченє дзецох, вона вше за функционалне и красне дзецинске бавилїще, стара ше о квиценю ядловца у центре валалу, як и орґанизациї Новорочного и Вельконоцного вашару. То лєм часц гевтого за цо ше вона заклада же би особи у потреби достали помоц, а єй валачанє мали розвагу и пред шветами промововали свою ручну роботу.