ОДЖАК – На пиятим турниру у ярнєй часци сезони у рамикох Лиґи младших катеґорийох до 14 рокох, котри отримани у Оджаку, млади рукометаше „Русину” зазначели єдно пораженє и єдну побиду.
На турниру у Оджаку одбавени седем змаганя, зоз Першей ґрупи А лиґи кажда екипа бавела по два змаганя. Русиновци перше змаганє страцели од екипи „Ґрафичар” з Бездану 14:9 (8:7). Перши полчас Русиновци провадзели процивнїков ритем бависка и успишно одвитовали на виволаня, но у другим полчасу препущели вельо нагоди процив квалитетней екипи „Бездану” котра перша на таблїчки.
У другим змаганю победзели екипу „Апатин” зоз Апатину. Ту тренере „Русину” комбиновали постави бавячох, та шицки бавяче мали нагоду опробовац ше на терену, понеже процивнїцка екипа була слабша. На початку у першим полчасу, можебуц прето „Русин” и трацел, алє по конєц нє дали процивнїком оддиху. Змаганє закончене зоз резултатом 22:21 (6:10).
З тей нагоди за „Русин” бавели: Стойков (9), Давид Надь (8), Ґовля (5), Ковачевич (2), Планчак (2), Гарди (2), Бодянец (1), Максимович (1), Накич, Гарди, Чордаш, Шимек и Дарко Надь, а мрежу чували Зорич и Новта.
Екипа „Русину” ше и далєй находзи на штвартим месце у ґрупи зоз 12 бодами, дзе после дзешец одбавених змаганьох маю зазначени шейсц побиди и штири пораженя, дали 133 ґоли, а їх мрежа ше затресла 116 раз. Исте число бодох на таблїчки ма и трецопласована екипа „Далматинац” зоз Ридїци, алє су у предносци зоз ґол розлику котра за тринац векша як „Русинова”. Другопласована екипа „Спартак” зоз Суботици зоз 16 бодами, пияте место забераю рукометаше „Апатину” з 8 бодами. Шесте место на таблїчки забера екипа „БСК 2012” зоз Бачкого Брестовцу а маю лєм 2 боди, док остатнєпласовани „Зомбор” нє ма боди.
Младих рукометашох „Русину” на тим турниру водзели тренере Злата Паплацко и Владо Планчак.