Благословена обновена церква св. Димитрия

автор аба
1k Опатрене

ПИШКУРЕВЦИ – У року означованя 240-рочнїци Крижевскей епархиї, 21. октобра одбул ше благослов обновеней грекокатолїцкей церкви св. Димитрия у Пишкуревцох.

Пред архиєрейску Службу Божу благословени криж на обряду котри предводзел крижевски владика Никола Кекич, а котри потим у церкви предводзел архиєрейску Службу Божу, дзе сослужели числени священїки бизантско-славянского и римского обряду.

Од наших грекокатолїцких священїкох тоту шветочносц и сослужованє на Служби Божей возвелїчали парохове зоз Петровцох, Миклошевцох, Райового Села, Осєку, Канїжи, Сибиню, Славонского Броду и Липовлянох, як и руководитель Каритасу Крижевскей епархиї и домашнї парох. Евангелию читал дякон Роман Ступяк, а апостол по руски шпивал поддякон Ливио Мариян зоз Заґребу. Цалу шветочносц провадзели здружени ґрупи шпивачох зоз миклошевского и петровского КУД котрих за тоту нагоду пририхтал и руководзел зоз шпиваньом о. Владимир Седлак, заменїк владического викара за Славонию и Срим.

6-Piskurevci 02

Пред полудзенком, у доме култури, одшпивана гимна Републики Горватскей и святочна писня Руснацох у РГ котри здружено одшпивали женска и хлопска шпивацка ґрупа з Миклошевцох и Петровцох а з пригоднима словами шицких привитал домашнї парох, о. Иґор Сикора, предсидатель Месного одбору Пишкуревци Златко Мезеї и други. Як визначни госци були член Совиту за национални меншини РГ Звонко Костелник, предсидателька Союзу Русинох РГ Дубравка Рашлянин, представнїца рускей националней меншини Осєцко-бараньскей жупаниї Агнетка Балатинац и предсидателє руских културно-просвитних дружтвох, як и дзепоєдни госци з Войводини котри пришли потримац тото красне збуванє.

У културней часци програми, котра тирвала под час полудзенку, наступело домашнє КУД „Зора” з горватским венчиком танцох и шпиванкох, и нашо културно-уметнїцки и културни дружтва зоз Миклошевцох, Петровцох, Вуковару, Винковцох и Райового Села зоз рускима шпиванками, а КУД „Осиф Костелник” и зоз фолклорнима миниятурами. За наступ их орґанизовал Союз Руснох РГ чийо су члени.

Церква св. Димитрия збудована пред 110 роками, 1906. року, кед у Пишкуревцох жило вельке число Руснацох.

6-Piskurevci 03

ПОВЯЗАНИ ТЕКСТИ