РУСКИ КЕРЕСТУР – Всоботу, 29. авґуста згорела шопа у обицу на Маршала Тита улїци, огень з меншей часци залапел и хижу, гашели го керестурски огньогасци ДОД, огньогасци зоз ДОД Кула, Професионална огньогасна єдинка зоз Кули, а помагали и валалчанє.
Огень ше случел пополадню, перши на терен вишли огньогасци ДОД Руски Керестур, зоз єдним камионом за штири минути од дояви, а нєодлуга пришол и други керестурски камион. Потим до помоци пришли ДОД Кула зоз єдним камионом, и Професионална єдинка Кула зоз двома камионами.
Як визначел Елемир Надь спред ДОД Руски Керестур, интервенция була наисце чежка, и щесце у нєщесцу було же нє дул витор, та ше им удало загашиц огень за два годзини. Попри тим, наглашел же зоз керестурского ДОД у гашеню огня участвовали аж 15 добродзечни огньогасци.
У огню настала велька материялна чкода, погорела шопа крижом у дворе, огень ше дакус преширел и на хижу, а дзекуюци благочасовей интервенциї зопарта ище векша чкода.
