БИКИЧ – На швето Успеня Пресвятей Богородици, познатше як Велька Матка Божа, вчера, 28. авґуста преславене храмове швето Кирбай.
Шветочну Службу Божу предводзел капелан у Руским Керестуре о. Владимир Медєши, а сослужовали парох з Бачинцох о. Юлиян Рац, парох з Вуковару о. Олеґ Закалюк, римокатолїцки жупник зоз Шиду о. Никица Бошнякович и домашнї парох о. Владимир Еделински Миколка.
Парох у Бачинцох о. Юлиян Рац наказовал и визначел же Пречиста Дїва Мария жила живот у любови до Господа Бога и кед ю Господ вознєсол на нєбо, вона у нєбе ознова отворела свойо очи, а за вирних то дзень позарядовей радосци.
На Служби Божей апостол читал Деян Бобаль, а Евангелию о. Юлиян Рац, вирни на служби крашнє шпивали.
Служба Божа законечна зоз Многолїтствийом, а окрем домашнїх на Кирбаю було и госцох зоз околних местох.
