РУСКИ КЕРЕСТУР – У Руским Керестуре, вчера вечар, у Велькей сали Дому култури, Йоаким Рац шветочно отворел ювилейни 50. Драмски мемориял Петра Ризнича Дядї, як предсидатель Орґанизацийного одбору.
З тей нагоди Рац визначел же за 50 роки през Мемориял прешли коло 500 представи, а то вельо аматерох и любительох театра зоз шицких наших местох. Рац поволал присутних на минуту цихосци за тих цо вецей нє медзи нами, а творели Мемориял и „ношели” представи.
Рац потим привитал шицких присутних – предсидателя Националного совиту Руснацох Славка Раца, заменїка покраїнского секретара за културу, информованє и одношенє з вирскима заєднїцами др Небойшу Кузмановича, помоцнїка покраїнского секретара за туризем Серґея Тамаша, автора вечаршей представи Милоша Николича зоз сотруднїками, представнїкох шицких институцийох и наших Дружтвох.
Предсидатель Рац окреме привитал и присутну фамелию Ризничових зоз Словениї, сина Петра Ризнича, чийо мено ноши Драмски мемориял, Павла зоз супругу и унука Александра зоз фамелию.
Ґу присутним ше озвал Павле Ризнич, и визначел же го вше цагало до Керестура дзе одроснул, и дзе приходзел кажди рок, а з тей нагоди му мило и цеши ше же зме превжали од його оца любов ґу театру и рускому язику.
После привитних словох емитовани полгодзинови филм о историї Драмского мемориялу хтори пририхтала Руска редакция РТВ Войводини и єй новинар Славко Винаї.
Пред початком представи „Ковалє” РНТ „Дядя” у режиї Владимира Надя, Рац подзековал и шицким институцийом цо помогли отримованє того ювилейного Драмского мемориялу.
