БЕОҐРАД – У рамикох Манифестациї Днї ческого и словацкого филму, котри отримани од 15. до 18. октобра у Югославянскей кинотеки, другого дня отримана и проєкция филма Потопа тогорочного словацкого кандидата за награду Оскар у катеґориї найлєпши странски филм.
Слово о вецей раз наградзованим длугометражним филму, котри источашнє и перши бавени филм на русинским язику у котрим ше обрабя тема вязана праве за русинску заєднїцу у Словацкей.
То перши постсоциялистични бавени филм, котри обрабя историйне висельованє людзох зоз валалох пре вибудов резервоару води Старина кед зачирени русински валали Старина, Звала, Смольник, Велика Поляна, Руске, Дара и Стужнїця початком 80-их рокох прешлого вику.
Режисер филму Мартин Ґонда, по походзеню тиж Русин. Сценарио подписую и Мартин Шустер и Доминика Удворкова, а написани є операюци ше на доступни документи и призначени паметаня людзох котри були шведкове тей нє милей подїї.
Робота на филму тирвала 6 роки од 2019. року, а знїмани є у септембру и октобру 2023. року у ширшим реґиону сиверозаходней Словацкей на локалитетох котри повязани зоз будованьом Старини, односно нє далєко од Снїни, валалу Чертижне, Медзилаборцох, Гуменим и Кошицох.
У Филму векшина ґлумцох зоз русинскей заєднїци. Режисер Ґонда комбиновал професийних словацких и професийних русинских ґлумцох зоз Театру Александра Духновича зоз Прешова, як цо Осиф Пантликаш, Володимир Чема, Владимира Штефанїкова, зоз аматерами зоз рижних русинских местох, та и зоз статистами.
Главну улогу дзивки Мари у филму бави Сара Хрипакова, котрей то була и перша улога у бавеним филму, а у виборе главней ґлумици условиє було же би знала бешедовац по русински.
По самей проєкциї филму, отримана и бешеда зоз продуцентом филма Томашом Ґичом, котри одвитуюци на питаня публики, виприповедал даскельо важни поєдиносци вязани за Русинох, котри як народ розошати по цалим швеце. Тиж, наявел и же по успишних прегваркох, филм Потопа будзе премиєрно приказани на Радио-телевизиї Войводини початком идуцого року. Филм вишол у продукциї компаниї Силверарт зоз Словацкей, а у копродукциї трох жемох: Чезкей Републики, Польскей и Белґиї котри го потримали финансийно.
У рамикох програми отримани проєкциї вкупно 11 филмох з обидвох жемох. Манифестация ше отримує под покровительством амбасади Ческей и амбасади Словацкей Републики.
