Вишли нови „Дзвони”, мож ше предплациц за нарок

автор маф
1.2k Опатрене

РУСКИ КЕРЕСТУР – У парохиї св. оца Миколая тих дньох вишло тогорочне остатнє, 12. число Християнского часопису „Дзвони”. Редакция поволує читательох предплациц ше на часопис за идуци рок – предплата виноши 1 000, а поєдинєчни прикладнїк 100 дин, место потерашнєй 800, односно 80 динари.

Найновше число „Дзвонох” з найвекшей часци пошвецене швету Рождества Христового, починаюци од Крачунскей винчованки на руским и українским язику нашого преосвященого владики Георгия. О Крачуну и духу дарованя з нагоди швета пише и рубрика „Стереотипи”, „Витамин за душу” и други.

„Дзвони” приноша и здогадованє на нєдавно упокоєного о. Романа Миза, на його священїческу и видавательну дїялносц, а у рубрики „Рочнїци”, обсяжни напис о о. Дюрови Биндасови з нагоди 140-рочнїци од його народзеня.

У додатку „Богословска думка” нови предлуженя Папового постсинадалного писма „Нїжносц любови”, и историят Марийового святилїща Водици.

Нови „Дзвони” приноша и други стандардни рубрики,  и звити з актуелних подїйох з наших парохийох и всеобщей Церкви.

ПОВЯЗАНИ ТЕКСТИ