НОВИ САД – Новини „Руске слово” нєшка, 15. юния полня 73 роки виходзеня и Новинско-видавательна установа „Руске слово”, прейґ хторей ше у Републики Сербиї витворює право на информованє и видавательство на руским язику, 73 роки постояня и роботи.
Од виходзеня першого числа 1945. року и нєшка, „Руске слово” нє лєм же информує, едукує и понука розвагу, алє першенствено афирмує национални интереси Руснацох, чува и розвива руски язик, национални идентитет и чувство припадносци у нашей рускей националней заєднїци, а шицко то зоз цильом злєпшаня положеня нас Руснацох у АП Войводини и Републики Сербиї.
Зоз друкованим тиражом од 2000 прикладнїки, нє рахуюци нащивеносц сайта Установи www.ruskeslovo.com и опатранє и читанє електронскей верзиї, новини „Руске слово”, медзи найчитаншима од новинох на язикох националней меншини, бо их чита кажди седми/осми Руснак.
Дзень Установи, дзень и других виданьох „Руского слова”: кнїжкох, хтори ше обявює у рамикох Видавательней дїялносци (1945), часописох: „Заградка” (1947), „Шветлосц” (1952) и МАК (1972), дзень и Сайта НВУ „Руске слово” з Рутенпресом (2006).
Снователь НВУ „Руске слово“ од 2004. року Национални совит рускей националней меншини, а дїялносц з векшей часци финансує Покраїнски секретарият за културу, явне информованє АПВ и одношенє з вирскима заєднїцами.
Порядну мешачну субвенцию од Покраїнского секретарияту за културу, явне информованє и одношенє з вирскима заєднїцами маю: новини „Руске слово”, МАК и Заградка. Вони по контракту за 2018. рок вєдно доставаю 32.640.000 динари, на 12 мешачни рати.
Средства за „Шветлосц” и кнїжки ше обезпечує прейґ конкурсох. У тим року, по тераз, на конкурсох одобрени средства за друкованє шицких штирох числох „Шветлосци” и за седем кнїжки.
Буджетни средства творя 80 одсто вкупних приходох Установи, хтори виноша 39 001 000 динари, а 20 одсто ше зарабя на тарґовищу, з предаваньом новинох, часописох, кнїжкох.
Установа ма 23-еро занятих на нєодредзени час и 4-еро занятих на одредзени час, як и вонкашнїх сотруднїкох. Установа ма и два дїловни простори и то у Новим Садзе (127,56 m2) на трецим поверху у Футожскей 2, у хторих ше находзи Завод за културу войводянских Руснацох и просториї Дописовательства (117,61 m2) у Руским Керестуре.
Зоз информативну и видавательну дїялносц НВУ „Руске слово” витворює уставни и законски права, на информованє и видавательство на руским язику. Оможлївює правочасну доступносц информацийох и литератури на руским мацеринским язику и з тим розвива културу и язик, пестує традицию, чува национални идентитет Русацох.