НОВИ САД – У Руским културним центре (Йована Суботича 8), пияток, 11. септембра отримана схадзка Управного одбору РКЦ.
На Дньовим шоре були шейсц точки, а найвецей ше бешедовало о орґанизованю преслави и означованю 80-рочнїци Руского културного центра. Заключене же ше рочнїцу означи зоз вецей подїї, а 21. новембра у Городскей концертней сали (Булевар цара Лазара 67) будзе шветочни концерт.
На схадзки порадзене же у Орґанизацийним одборе за означованє рочнїци буду члени УО РКЦ, а у Уметнїцким одборе буду уметнїцки руководителє секцийох РКЦ.
Надалєй слова було о реновираню и санациї просторийох. Вяри пукла водоводна цива и бул розкопани цали двор, а директор РКЦ Владимир Сивч поинформовал же роботи тирвали, алє же заменєни стари водоводни циви, шахти и вентили, тиж и же оправена и лєтна бина.
Члени УО поинформовани и о проєктох РКЦ хтори по тераз реализовани и хтори буду реализовани у наиходзацим периодзе.