Дом култури и „Байка” госцовали у Словацкей

автор зам
1.1k Опатрене

РУСКИ КЕРЕСТУР –  Музично-танєчни ансамбл Дому култури и членїци Здруженя женох „Байка” з Руского Керестура од 29. априла по 2. май госцовали у Словацкей на Фестивалє „Токай у Европи”, односно „Дїдовщина” у Словацким Новим Месце, а ансамбл Дому култури наступел у ище трох местох у Кошицким самоуправним краю – Земплинскей Теплици, Сланским Новим Месце и Чергове.

Госцованє у Словацкей витворене на поволанку орґанизаторох – Општини Словацке Нове Место, алє и Земплинскей Теплици, з хтору Руски Керестур сотрудзує од скорей, так же им домашня була и старостка Теплици Йозефина Угальова.

Керестурци у Земплинскей Теплици 29. априла отримали цаловечарши концерт, внєдзелю, 30. априла з вецей точками участвовали на програмох у Сланским Новим Месце и у Чергове, а 1. мая заварли спомнути фестивал у Словацким Новим Месце. На Фестивалє, попри домашнїх, участвую и ансамбли Словацох котри жию поза гранїци Словацкей и того року були з Мадярскей и Румуниї.

На госцованю у Словацкей були Виводзацки танєчни ансамбл Дому култури зоз штирома хореоґрафиями, Дзивоцка шпивацка ґрупа, шпивацки дуети Дорика Чизмар-Наташа Колєсар, Таня Надь-Кристина Афич, котри, попри Санї Чапко, мали и шпивацки солистични точки. Шицких провадзел Народни оркестер Дому култури, хтори и сам грал Венчик руских шпиванкох.    

Состойна часц Фестивалу „Токай у Европи” – „Дїдовщина” бул и Саям традицийних народних ремеслох и виробкох на хторим Здруженє женох „Байка” з Руского Керестура, на заєднїцким штанду зоз женми зоз Земплинскей Теплици, виложело роботи своїх членїцох, а спред „Байки” у Словацкей були предсидателька Здруженя Славица Катона, єй заменїца Наталия Емейди, Мария Винаї и предсидатель Здруженя ремеселнїкох и приватних поднїмательох Владимир Емейди.

Одход „Байки” до Словацкей финансовала Месна заєднїца Руски Керестур, а Дом култури драгу и осиґуранє за членох свойого ансамблу. Танєчни ансамбл за госцованє пририхтал Сашо Паленкаш, а оркестер, Дзивоцку шпивацку ґрупу и шпивачки Мирко Преґун.

ПОВЯЗАНИ ТЕКСТИ