СТАРИ ЯНКОВЦИ (ГОРВАТСКА) – До конца того мешаца членски орґанизациї маю доручиц мена делеґатох и госцох учашнїкох на Штернастим Шветовим конґресу Русинох/Руснацох/Лемкох (ШК РРЛ), як и Осмим Шветовим форумом младих (ШФМ) РРЛ, хтори од 29. юния по 2. юлий буду отримани у Осиєку, у Горватскей, догварене на схадзки Шветовей ради (ШР РРЛ, хтора 6. мая отримана у Старих Янковцох, у Горватскей.
Як и за дотерашнї, и на наступним ШК кажда його орґанизация-членїца будзе мац по 10 делеґатох и по пейц госцох, а на ШФМ кажда членїца по 5 делеґатох, гварел за Рутенпрес предсидатель Рускей матки (РМ) Сербиї и член ШР РРЛ Дюра Папуґа з Руского Керестура.
Медзи иншим, на Конґресу у Осиєку ма буц принєшени и нови Статут ШК РРЛ, а на схадзки Ради у Старих Янковцох, под предшедованьом єй предсидателя Штефана Лявинца з Мадярскей, прилапене и предкладанє Комисиї за културу ШК же би тогорочну Награду ШР „Василь Турок Гетеш” достала Наталия Гнатко з Горватскей, учителька руского язика у Петровцох, терашнї секретар Дружтво Руснацох у Републики Горватскей „Руснак” и дакедишня членїца Шветовей ради. Кандидат за тоту награду бул и подобови уметнїк Владо Няради з Вербасу, спред РМ Сербиї.
Домашнї членом Ради и Форуму младих бул подпредсидатель ШР Мийо Шайтош з Янковцох, медзитим, на Форуму младих отримана лєм начална догварак, понеже нє було кворуму за одлучованє. Попри Комисиї за културу, у чиєй роботи спред РМ участвовали Мария Дорошки и Славко Пап з Керестура, у Старих Янковцох зашедала и Ревизийна комисия ШК, под предшедованьом Юлияна Лазора спред РМ з Руского Керестура.
После зашеданьох, у будинку Општини Стари Янковци отримане стретнуце ШР РРЛ з предсидательом Координациї рускей националней меншини Републики Горватскей Борисом Бучком, а потим и културно-уметнїцка програма, на хторей участвовали школяре котри у Янковцох виучую руски язик и културу, члени Здруженя Мадярох з того места, члени спомнутого дружтва „Руснак”, як и соло-шпиваче зоз Закарпатя у України.