НОВИ САД – Роботи на вибудови нового Жежельового мосту на Дунаю у Новим Садзе буду закончени концом октобра, або початком новембра того року, наявела позавчером подпредсидателька Влади Сербиї и министерка будовательства Зорана Михайлович, а предсидатель Покраїнскей влади Иґор Мирович вчера гварел же технїчни план за законченє роботох на Жежельовим мосце 21. новембер, после чого будзе склонєни постояци монтажни мост.
Вибудов мосту заєднїцки финансую Войводина, Влада Сербиї и ЕУ, а як гварела министерка Михайлович, то стратеґийно важни проєкт, понеже Жежельов мост часц гайзибанскей драги Беоґрад-Будапешт, будзе хасновани и за драгови транспорт, та и за бициґлистох.
Роботи на вибудови Жежельового мосту, хтори звалєни у НАТО-бомбардованю, а нови ше будує на месце старого, з републичнима, покраїнскима и городскима функционерами вчера обишол и комесар за преширенє ЕУ Йоганес Ган.
Мирович вчера гварел же гайзибански транспорт по мосце найвироятнєйше руши у новембру, стреду видата дополнююца будовательна дозвола за приступни драги, а австрийски виводзач роботох наявел же 16. юния почню роботи на петроварадинским боку.