КУЛА – Крамерова улїца у Кули уж тидзень отворена за транспорт, после остатнєй реконструкциї, котра була треца по шоре, понеже ше кажда указала як нєудатна кед ше порозходзели бехатон коцки котри були поставени.
Зоз остатню реконструкцию, тото цо мож обачиц то же положени бехатон коцки менших димензийох и иншакей форми котри складани по принципу пузлох, а нє лєм як обични квадрати.
Перша реконструкция Крамеровей улїци була вєшенї 2016. року, потим у маю 2017. року, а остатня, треца закончена тих дньох. Гражданє ше зоочовали зоз вельким проблемом прето же була заварта за транспорт, а очкодовани були и приватни поднїмателє котри закупйовали локали у тей улїци.
Виводзач роботох було суботицке подпприємство „Терекс”, а остатнї роботи окончовало друге подприємство як подвиводзач роботох за спомнутого виводзача. Реконструкция Крамеровей улїци финансована зоз буджету Општини Кула, и то лєм раз, понеже кажда шлїдуюца реконструкция окончована у ґарантним року.