З концертом Керестурцох закончени 44. „Петровски дзвон”

автор мар
1k Опатрене

ПЕТРОВЦИ (ГОРВАТСКА) – Внєдзелю, 4. юния, з цаловечаршим концертом музично-шпивацкого ансамблу Дому култури Руски Керестур закончена 44. Културна манифестация „Петровски дзвон”, а на концерту у Петровцох участвовали Дзивоцка шпивацка ґрупа, вокални солисти и дует и Вельки народни оркестер Дому култури.

Оркестер одграл три инструментални композициї – „Петровски дзвон”, з хтору концерт отворени, потим „Швитанє” и „Ружи, червени ружи”, з чим концерт и Манифестация заварти, а публика цалу шпиванку и одшпивала.

Дзивоцка шпивацка ґрупа ше представела зоз шпиванками „Maмо моя мамо”,  „Там под лєсом калїновим” и  „Ей, бетяр я дзивочка”, а провадзело их скандированє публики, як и под час наступу соло-шпивачох Себастияна Надя зоз „Стару ґитару”, Александри Русковски зоз шпиванку „На танцу”, Санї Чапко зоз „Червенима чижмочками”, Марини Роман з „Най му слунко швици”, Мирослава Малацка з композицию „Чарни очка моєй милей”, Танї Надь зоз шпиванку „Хлапцох кед вербовали”, Кристини Афич з народну шпиванку „Кед би чарни очка”, та дуету Наташи Колєсар и Дорики Чизмар, котри шпивали „Шалєна я була”. Шпивачох и Оркестер пририхтал музични руководитель Мирко Преґун.

Госцох з Керестура на початку Концерту привитала предсидателька Союзу Русинох Републики Горватскей Дубравка Рашлянин, а на концу програми о.д. директора Дому  култури Руски Керестур Йоаким Рац Мими, медзи иншим, Руснацох з Горватскей поволал до Керестура на тогорочну „Червену ружу”.

ПОВЯЗАНИ ТЕКСТИ