СЕРБИЯ – Нєшка, 22. октобра од пол ноци у Сербиї почина предвиберанкова цихосц пред позарядовима парламентарнима виберанками, а тирва по заверанє виберацких местох – по 20 годзин на нєдзелю, 25. октобра.
На нєдзелю, 25. октобра, гражданє з правом гласа буду гласац за нове зволанє Народней скупштини Републики Сербиї.
Гласацке право на позарядових виберанкох за републични парламент маю шейсц милиони 450.523 гражданє уписани до Общого виберацкого списку, а годни гласац на 8392 гласацких местох, oд чого 93 гласацки места у иножемстве у 37 державох, дзе приявени 102.147 гласаче.
На дзень виберанкох, гласацки места буду отворени од 7 по 20 годзин. На гласацке место треба вжац важаци особни документ (особну карточку, лєбо пасош), а препоручене же би ше вжало и поволанку хтору гражданє достали на особни адреси.
За републични парламентарни виберанки Републична виберанкова комисия (РВК) преглашела 18 лїстини, на хторих 2418 кандидати конкурую за 250 посланїцки мандати.
Републична виберанкова комисия найпознєйше на штварток, 29. октобра до 20 годзин (96 годзини як ше завру гласацки места) у „Службеним глашнїку” обяви резултати виберанкох.