МАЛИ ЛОШИНЬ (РЕПУБЛИКА ГОРВАТСКА) – Репрезентация Серибиї у мини–фодбалу У23, освоєла Шветове першенство у Малим Лошиню у Републики Горватскей, хтори бул отримани штредком октобра, а член златней репрезентациї бул и наш Альоша Дюранїн зоз Сримскей Каменїци.
На Шветовим першенству у мини-фодбалу участвовали 9 репрезентациї: Сербия, Азербейджан, Румуния, Мадярска, Словацка, Анґлия, Україна, Ческа и УАЕ.
Репрезентация Сербиї витворела одлични резултати на драги до шампионского погара. У ґрупней фази победзели репрезентацию Ческей зоз резултатом 3:2, потим Україну 3:0, УАЕ зоз 5:0 и Анґлию 4:2.
У полуфиналним стретнуцу нашо репрезентативци победзели Мадярску зоз 5:0, док у финалу були лєпши и победзели репрезентацию Руминиї зоз високим резултатом 4:1.
За найлєпшого бавяча финалного стретнуца (MVP), бул преглашени Душан Влалукин, найлєпши стрилєц турниру бул Срдян Радакович (8), а за найлєпшого ґолмана преглашени Алекса Паковлєвич, шицки троме зоз репрезентациї Сербиї, док за найлєпшого бавяча Шветового першенства преглашени Лука Митрица зоз репрезентациї Румуниї. Награду за фер-плей достала репрезентация УАЕ.
Орґанизатор Шветового першенства у мини-фодбалу за бавячох до 23 роки у Малим Лошиню була Шветова мини-фодбалска федерация (World Minifootball Federation – WMF).
