ВЕРБАС – Аматере КПД „Карпати” вовторок, 20. юния, наступели на городскей площи у Вербаше у рамикох манифестациї Културне лєто.
Дружтво на лєтнєй бини у центре городу виведло вецей точки зоз свойого репертоару, а перши наступели вокални солистки Аґота Ковач и Кристина Будински зоз шпиванку „Ровнїно моя”. Пририхтала их Славка Тамаш.
Публики ше представела и дзецинска фолклорна секция з хореоґрафию „Жито”, хтору обдумал и пририхтал Славко Микитишин, Мишана шпивацка ґрупа одшпивала венчик народних шпиванкох, а шпивачох и танєчнїкох провадзел оркестер, под руководительством Миколу Чизмара.
Окрем КПД „Карпати”, на програми Културного лєта вовторок наступели и члени мадярского КУД „Сирмаи Кароль” з Вербасу и чарногорского КПД „Принцеза Ксения” з Ловченцу.
Културне лєто будзе закончене нєшка з наступом фолклорних секцийох з вербаскей општини и новосадского фоклорного здруженя „Вельке коло”.