БЕОҐРАД – У ярнєй шатви у Сербиї найвецей поверхносци будзе под кукурицу, медзи 980 000 и милион гектари, цо дакус менєй як влонї, гварел вчера за Танюґ директор Здруженя „Жита Сербиї” Вукосав Сакович.
Ярня шатва у Сербиї тераз почала лєм за цукрову цвиклу и обчекує ше же з тоту културу того року буду зашати медзи 45 000 и 60 000 гектари, гварел Сакович.
Наглашел же того року будзе вецей сої, бо скорейши роки мала добру цену и обчекує ше же тота култура у ярнєй шатви будзе пошата на поверхносци од 220 000 по 250 000 гектари.
Слунечнїк у ярнєй шатви будзе зашати на од 200 000 до 220 000 гектари, а ярец на коло 20 000 гектарох – гварел Сакович, надпоминаюци же польопривреднїки керую ярню шатву жита пре нїзки урожаї.
Сакович наглашел же польопривреднїки добре пририхтали жем за ярню шатву, медзитим у жеми єст мало влаги, та би дижджи добре пришли.
По його словох, вецей як половка жита пошатого у єшеньскей шатви у одличним стану и нє обчекую ше нїяки утрати пре нєодвитуюцу хвилю у предходним периодзе.
Под житом у єшеньскей шатви зашати 539 817 гектари, а по реґионох, у Войводини жита пошате менєй за 3,6 одсто, у беоґрадским реґионє за 10,8 одсто, у южней и восточней Сербиї за 12,8 одсто, а у Шумадиї и заходней Сербиї под житом зашати 6,1 одсто менєй поверхносци як прешлого року.