РУСКИ КЕРЕСТУР/ДЮРДЬОВ/КОЦУР – На Републичним змаганю зоз сербского як нємацеринского язика, хторе 28. априла отримане у ОШ „Соня Маринкович” у Зренянину, частвовали 95-еро школяре седмих и осмих класох зоз 35 школох, медзи нїма и петнацецеро школяре зоз школох у наших местох.
З ОШ „Петро Кузмяк” з Руского Керестура на Републичним змаганю участвовали шесцеро школяре и у конкуренциї седмих класох Леонтий Сивч освоєл перше место, а треце место завжали Александар Киш и Леон Юрич. У катеґориї осмих класох Соня Балїцки и Теодора Новакович освоєли друге место, а на змаганю участвовал и Давор Хома з осмей класи. Школярох у Керестуре пририхтала наставнїца сербского язика Мария Балїнт.
З ОШ „Йован Йованович Змай” з Дюрдьова на Републичним змаганю зоз сербского як нємацеринского язика участвовали три школярки, и у катеґориї осмих класох перше место освоєла Лидия Чапко, а треце Валентина Салаґ. У конкуренциї седмих класох ше змагала Єлена Мудри, а школярох пририхтали наставнїки сербского язика Даниєла Самарджич и Оскар Пурґич.
З ОШ „Братство єдинство“ з Коцура на тим змаганю участвовали шесцеро школяре – Таня Буїла, Дарина Михняк, Єлена Чордаш и Дария Чордаш зоз седмей и Александра Русковски и Йована Колєсар з осмей класи, а пририхтали их наставнїци Снежана Шанта и Ясмина Олич-Илчешин.
Ґу тому змаганю треба додац же на Медзиокружним змаганю з биолоґиї, хторе отримане 22. априла у Кляїчеве, школяр седмей класи керестурскей ОШ „Петро кузмяк” Леон Юрич освоєл треце место, а пририхтовала го наставнїца биолоґиї Єлена Шомодї.