РУСКИ КЕРЕСТУР − Вчера на Други дзень Крачуна, пред численима Керестурцами и їх госцами, у Велькей сали Дома култури Руски Керестур отримани уж традицийни Крачунски концерт „С нами Бог”.
Концерт отворели дзеци з фолклорних ґрупох Дома култури Руски Керестур з коляду „Пречистая дїва”, а потим керестурски парох о. Михайло Малацко повинчовал Крачун шицким котри го славя по григориянским календаре и визначел радосц родзеня Исуса Христа сина Божого.
Дзеци з виронаучней ґрупи виведли драмску сличку „Крачунска приповедка” и одшпивали коляду „Пахняце шено”. Школски дзецински хор „Дзвончки” одшпивал коляду „Небо и земля”, а наступели и дзеци зоз Школи за основне музичне образованє, перше ше у дуету гармоникох представели Стефан и Марко Колошняйово котри одграли „Пречистая дїва”, а Камерни состав „Три коляди”.
Мишани хор Дома култури наступел зоз трома крачунскима писнями, а госцуюци Мишани хор „Теотокос” зоз Львова з України виведол аж пейц коляди. Концерт закончени зоз коляду „Вифлєми новина” котру вєдно одшпивали домашнї и госцуюци хор, а на инициятиву госцуюцей дириґентки Софиї Гакавчин, придружела ше и публика.
Орґанизатор тогорочного концерту бул Дом култури, а програму пририхтали Сашо Палєнкаш, ш. Авґустина, Оленка Живкович, Мирон Сивч и Лидия Пашо. Авторка конферанси була Мария Стрибер, а водителька програми Ребека Семан.
