На Перши дзень Архиєрейска Литурґия

автор маф
840 Опатрене

РУСКИ КЕРЕСТУР – Вирни парохиї св. оца Миколая Перши дзень Рождества Христового шветочне преславели у Катедралним храме на Архиєрейскей Литурґиї хтору предводзел владика новопреглашеней епархиї св. оца Миколая Георгий Джуджар зоз осем священїками – домашнїма и з других наших парохийох.

Владика Георгий шицким повинчовал Крачун як швето зоз хторим нєбо и жем преславюю приход Исуса на жем и пожадал най нашо шерца буду тоти яшелька хтори го приму.

– Най мир Божи наполнї и ошвици нашо шерца же бизме були ношителє його мира медзи собу и ближнїма – заключел владика.

Шветочней духовней атмосфери окреме допринєсли два хори хтори шпивали на Служби Божей, а то домашнї Хор св. оца Миколая и Дому култури предводзени з дириґентку Лидию Пашо и госцуюци хор зоз Львова – Камерни хор Теотокос Храму рождества пресвятей Богородици, на чолє з дириґентку Софию Хакавцин.

Євангелию читал парох вербаски о. Алексий Гудак, апостол домашнї дзияк Янко Виславки, а присутни були домашнї парохиянє и їх госци, а Службу провадзели и нашо медиї.

Нєшка, на други дзень Крачуна – Собор Богородици, Служби Божо буду на 8, 10, 11,30 и на 17 годзин и у шицких будзе и мированє вирних. По вечаршей Служби на 18 годзин у Доме култури будзе Крачунски концерт „З нами Бог” на хторим попри домашнїх учашнїкох наступи и госцуюци Хор зоз Львова.

ПОВЯЗАНИ ТЕКСТИ