НОВИ САД – У Новим Садзе всоботу, 13. мая, перши подпредсидатель Влади Сербиї и министер вонкашнїх дїлох Ивица Дачич отворел 84. Медзинародни польопривредни саям и з тей нагоди гварел же Влада Сербиї потрима польопривреднїкох у посцигованю максималних резултатох, „бо то вец и успих шицких нас”. По його словох, польопривреда то єдини конар нашей привреди хтори нє заказал анї у найчежших часох.
Предсидатель Покраїнскей Влади Иґор Мирович на отвераню Сайму наглашел же, дзекуюци доброму сотруднїцтву медзи републичнима и покраїнским институциями, пририхтани и значни мири потримовки, окреме младим польопривреднїком.
На Сайме продукти и услуги зоз 60 жемох представяю 1 500 викладаче, того року жем-партнер Босна и Герцеґовина, ту и богата вистава польопривредней механїзациї, национална вистава статку и вистава орґанскей продукциї, а у Конґресним центре ше орґанизує промоциї, презентациї, фахово сходи и други дїловни подїї.
Спомедзи новших змистох то аукция статку, а того року ше отримує и Перши Медзинародни саям идейох, иновацийох и пренаходкох.
Польопривреднїки на тей манифестациї можу поднєсц и вимогу за купованє нового трактора, моцносци до 100 киловати, а интересованє за тоту поволанку, обявену початком априла, барз вельке.
Нащивителє Сайма можу достац и даєден дарунок у наградним бависку, хторе пририхтане у сотруднїцтве з викладачами, а главна награда трактор „Беларус 82,1”, хтори кошта 20 500 еври и дарує го „Аґропанонка”.
Капури Новосадкого сайму отворени од 9 до 19 г., а цена уходнїци 600 динари. Уходнїца за колективни нащиви 400 динари, док за пензионерох, дзеци од 7 до 12 роки, школярох и студентох котри Саям нащивя колективно кошта 200 динари.
