СЕРБИЯ – Єдна з новосцох у вименкох и дополнєньох Закона о безпечносци у транспорту и дошлєбодзенє обегованя прейґ полней линиї, насампредз превозкох хтори иду помали, як цо то трактори, алє лєм кед ше нє загрожує безпечносц шицких учашнїкох у транспорту. По Предлогу, даєни кари за транспортни потупеня буду звекшани, а даєдни зменшани.
Предвидзене и зменшанє горнєй гранїци концентрациї алкоголу у креви з терашнїх 0,3 на 0,2 промили. То ше нє одноши на професийних вожачох, моторкашох и вожачох з пробнима дозволами, котри нє шму мац нїч алкоголу.
Хто у креви будзе мац до 0,5 промили алкоголу будзе плациц кару 10 000 динари, а до 0,8 промили загрожена кара до 20 000 дин. По прилапйованю того Закона, хто будзе мац вецей як 2 промили алкоголу у креви – останє без авта, а достанє и 30 до 60 днї гарешту, понеже то будзе третироване як насилне воженє, пишу „Новосци”. Шицки новосци предвидзени пре зменшанє числа транспортних нєщесцох.
Тиж буду звекшани и кари за хаснованє мобилних телефонох под час воженя и за нєвязанє ременьох – з терашнїх 5 000 на 10 000 динари.
За потупеня як цо то воженє под дїйством алкоголу од 1,2 до 2,0 промили, воженє без положеного вожацкого испиту, за прекроченє дошлєбодзеней швидкосци од 80 до 100 километри на годзину звонка населєня, од 70 до 90 километри на годзину у населєню и 50 километри у зони спомалшеного транспорту, предвидзени кари од 100 до 120 тисячи динари.