РУСКИ КЕРЕСТУР − Здруженє паприґарох „Капсикум анум” вчера вечар отримало схадзку на котрей Владимир Варґа винєсол информациї о Конкурсу за софинансованє инвестицийох до заградкарства, медзи котрима и залївни системи „капка по капку” котри розписал Покраїнски секретарият за польопривреду.
Як поведзене, тераз першираз на Конкурсу значно пооштрени критериюми зоз нову систему бодованя и зоз огранїчену поверхносцу на котрей польопривредне ґаздовство ма реґистровани заградкарски култури до 2,99 гектари. Вецей од половки рускокерестурских паприґарох нє годни сполнїц минималне число бодох, та розпатрана можлївосц писаня петициї до Покраїни.
Друга можлївосц за паприґарох же би конкуровали за подобни средства при републичней Управи за аґрарни плаценя котра средства додзелює по вигоднєйших критериюмох, алє з другого боку, по їх правилнїку, инвестицию нє мож реализовац такой, алє потребне чекац ришенє, цо з искуствох може буц и до єдного рока.