РУСКИ КЕРЕСТУР – После рокох отримованя у Школско-спортскей гали, фестивал алтернативней музики „Водова фест” ознова ше отримує на базену, дзе и започал. Перши вечар, пияток 17. юлия, бул резервовани за електронски звук, та ше на бини зменьовали ди-джейове.
Фестивал отворел керестурски ди-джей Алеко, односно Алексей Надь, хторому то бул и перши наступ вообще и зоз звуками познатей денс и хаус музики отворел фестивал и наявел добру атмосферу. Потим наступел дакус искуснєйши ди-джей Ками зоз Кули, хтори пущал преважно домашнї гити, а после нього наступел ище єден керестурски ди-джей Мрле, односно Бранимир Боянович, познати музични уметнїк зоз вецей як 20 роки искуствия. До ранших годзинох публику забавял новосадски дуо под назву Контакт.
Други дзень Водовей почнє нєшка на 18 годзин а резервовани є за наступи бендох. Пред тим як на бину виду познати беоґрадски панк и рок бенди „Йорґовани”, „Исказ” и „Осми дзень”, фестивал отворя нашо домашнї, керестурски бенди „Women power”, „Шорт нотис” и „Мацерово мушкатли”. По законченю наступох, за афтер журку до рана тиж буду задлужени керестурски ди-джей Хруби, односно Михайло Грубеня и дуо зоз Дроп Сенсеи орґанизациї, Бранимир Боянович и Борис Ройко.
За розлику од дакедишнєй Водовей, кед було вецей бини на векшей поверхносци коло базену, тогорочни фестивал забера поверхносц лєм на часци базену такповесц од Водици, а главни уход коло чарди Лонґов. У оградзеним просторе, такой на уходзе змесцена менша бина за ди-джейох, а на другим концу поставена велька бина за бенди. Окрем музичней часци, фестивал понука и забавни парк за наймладших, простор за ошвиженє як и безплатни камп.
Уход на фестивал безплатни.