РУСКИ КЕРЕСТУР – Пресадзованє паприґи у рускокерестурским хотаре идзе релативно швидко и пресадзени коло три штварцини з коло 800 гольтох, кельо оценєте же того року будзе под паприґу.
Як Рутенпрес дознава од длугорочних паприґарох, того року дакус бул проблем виховац пресаду паприґи пре жимни периоди у фази сходзеня, познєйше и пре хробаки и кертици хтори нападали кореньову систему, та и рижни охореня, алє єст паприґарох котри пресаду успишно виховали.
Пре винєшени причини, пресади у Керестуре, алє и у других местох нєт досц, та попри Керестурцох, пресаду у валалє куповали и паприґаре з Деспотова, Вайскей, Крущичу, Лалитю, аж и з Нового Милошева. Квадратни метер пресади, у хторим єст 600 до 800 коренки, предавани од 10 до 12 еври.
Роботнїкох за пресадзованє паприґи єст досц и нє требало ше напредок записовац за обезпечованє наднїчарох. З роботнїками пресадзованє паприґи мож догвариц аж и нєшка за ютре, цо скорейши роки нє бул случай.
