БЕОҐРАД – Предсидателька Совиту за национални меншини Влади Републики Сербиї, министерка державней управи и локалней самоуправи Ана Брнабич за нєшка, 23. май, заказала схадзку спомнутого Совиту, хтора будзе на 12 годзин у Беоґрадзе.
Як наявене, попри предсидательох, лєбо представительох 20 националних совитох националних меншинох, на схадзки буду присуствовац и члени Совиту – перши подпредсидатель Влади и министер вонкашнїх дїлох Ивица Дачич, министер просвити Младен Шарчевич, министер култури и явного информованя Владан Вукосавлєвич и министерка правди Нела Кубурови. Спомнути министри би мали винєсц и информациї о витворених активносцох вязаних за национални меншини.
На дньовим шоре и звит о запровадзованю Акцийного плану за витворйованє правох националних меншинох, о чим будзе бешедовац о.д. директора Канцелариї за людски и меншинсаки права Влади Сербиї Сузана Паунович.
Тиж так, державни секретар у Министерстве державней управи и локалней самоуправи, котри и предсидатель Роботней ґрупи за пририхтованє нарису вименкох и дополнєньох закона Иван Бошняк винєше информацию о дотераз поробеним на Нарису закона о защити правох и шлєбодох националних меншинох, а мал би буц прилапени и предлог приоритетних обласцох за финансованє з Буджетного фонду за национални меншини у тим року.
Спред Националного мсовиту Руснацох на схадзки будзе присуствовац предсидатель Вивершного одбору Совиту Желько Ковач.