РУСКИ КЕРЕСТУР – У парохиї св. оца Миколая у Руским Керестуре, по григориянским календаре нєшка швето Стритениє Господнє, а у вецей наших парохийох нєшка почина и Лурдеска дзевятнїца. На ютре перша Задушна собота.
Швето Стритениє Господнє припомина євангелску подїю кед Мария и Осиф, по тедишнїм закону, малого Исуса однєсли приказац Богу. Ту их стретли старик Симеон и пророкиня Ана, котри у малим дзецку препознали будуцого Месию.
Швето у керестурскей церкви будзе означене на службох Божих на 8, 10 и 17 годзин.
Нєшка почина и побожносц Лурдескей дзевятнїци, хтора ше (през дзевец днї) модлї по 11. фебруар, кед и наша Церква означує нєзаповедане швето Лурдескей Богородици – дзень єй чудесного указаня у французким месце Лурду 1858. року.
Лурдеску дзевятнїцу ше у Керестуре будзе модлїц кажди вечар на 16,15 г., пред Вечаршу Службу Божу хтору ше служи у Лурдескей каплїци на Капущаним шоре.
Лурдеску дзевятнїцу ше модлї и у других наших грекокатолїцких парохийох – у церкви, лебо по обисцох.
У рускокерестурскей парохиї на ютре перша у тогорочним циклусу пейцох Задушних соботох, окремного молитвеного здогадованя на шицких покойних. Служба Божа и панахида буду у Катедралней церкви на 8 годзин.