Отримана ище єдна Подобова колония „Стретнуце у Боднарова”

автор сас
940 Опатрене

ҐОСПОДЇНЦИ – Од прешлого пиятку по нєдзелю, у голу Основней школи „Жарко Зренянин”у Ґосподїнцох отримана 14. Колония подобових уметнїкох, а внєдзелю и 17. Дзецинска колония „Стретнуце у Боднарова”.

У трох уметнїцких дньох у Ґосподїнцох участвовали, потераз найвецей, трицец шесцеро старши уметнїки хтори мальовали на шлєбодну тему. На Дзецинскей подобовей колониї участвовало двацец єдно дзецко, а рисовали слунечнїки на хлєбовки. Остатнї дзень Подобовей колониї, внєдзелю, учашнїки нащивели Ґалерию Месней заєднїци Ґосподїнци дзе виложени роботи зоз прешлорочней, тринастей подобовей колониї.

Тогорочна колония отримана у рамикох означованя 80 рокох од народзеня Гелени Канюх, подобового педаґоґа, и 50 рокох од народзеня Владимира Вєштици, Mаї Дороґхази и Весни Йович, подобових уметнїкох-учашнїкох Подобовей колониї „Стретнуце у Боднарова“.

Перша вистава тогорочних роботох, традицийно, будзе на Вилїю, тиж у Ґалериї.

Орґанизатор Колониї Дружтво за руски язик, литературу и културу, а отриманє помогли Општина Жабель, котра дала найвекшу финансийну потримовку, Национални совит Руснацох, Покраїнски секретарият за образованє, предписаня, управу и национални меншини-национални заєднїци и спонзоре. У орґанизациз помогли и Месна заєднїца Ґосподїнци и валалска Основна школа „Жарко Зренянин“.

ПОВЯЗАНИ ТЕКСТИ