БЕОҐРАД – За директни субвенциї у польопривреди того року опредзелєни 18,67 милиярди динари, а з Уредбу Влади Сербиї утвердзени и субвенциї реґистрованим польопривредним ґаздовством у 2017. року.
За рошлїнску продукцию субвенция иста як и прешлого року – 2 000 динари по гектаре, и ище 2 000 дин. за реґресованє горива.
Премия за млєко будзе 7 дин. за литру, за приплодни крави дойки 25 000 дин. по глави, як и за крави и буяци за карменє. За карменє яловкох и целятох субвенция будзе 10 000 дин. по глави, а за кажде новооцелєне целє за карменє 5 000 динари по глави.
Субвенция за прашачки и корнази по глави будзе 10 000 дин., а за карменє швиньох 1 000 динари по глави.
За приплодни овци и за барани, за кози и цапи субвенция 7 000 дин. по глави, а за баранчата и кощата 2 000 дин. по глави.
За кури чежкого типу субвенция 60, лєгкого типу 100 динари по фалату, а за родительки пульки 300 дин. по фалату.
За квалитетни приплодни матки потьки и пеструшки субвенция 500 динари за фалат, док за продукцию конзумней риби 10 дин. за килограм випродукованей риби.
Одредзена и субвенция за пчоларох – 720 динари по кошнїци пчолох.
У субвенцийох предвидзене же польопривреднїки можу глєдац пенєж и за маґазинованє роби у явних маґазинох, а субвенция виноши 40 одсто трошкох маґазинованя.