НОВИ САД – Предсидатель Покраїнскей влади Иґор Мирович и подпредсидатель Покраїнскей влади и покраїнски секретар за образованє, предписаня, управу и национални меншини-национални заєднїци Михаль Нїлаш з представителями образовних установох у Войводини вчера подписали контракти за скоро 48 и пол милиони динари, на основи двох конкурсох спомнутого секретарияту – за виробок проєктно-технїчней документациї за основни, штреднї школи и доми школярох, як и за предшколски установи, а на тот конкурс конкуровали єдинки локалней самоуправи.
За виробок проєктно-технїчней документациї за оправяня и инвестицийни укладаня до школских обєктох з буджету АП Войводини опредзелєни 45 милиони 275 000, а за подобни намени за предшколски установи 3 милиони 200 000 динари. На обидва конкурси сцигли 320 прияви за 218 установи, а вчера подписани 223 контракти.
На подписованю контрактох предсидатель Покраїнскей влади Иґор Мирович гварел же з тим започата єдна велька, приоритетна робота Покраїнскей влади, а после вирабяня потребней документациї, за конкретни роботи на обнавяню школских будинкох и простору образовни установи годни конкуровац до єдинкох локалних самоуправох, до Канцелариї за явни укладаня Влади Сербиї, аж и до Европскей униї.
И Мирович и Нїлаш визначели же по ребалансу покраїнского буджету, хтори ше обчекує у юнию, буду обезпечени нови средства за подобни намени, так же ресорни секретарият знова розпише конкурси, за хтори би ше школи уж тераз мали почац пририхтовац.