ВЕРБАС – Нєшка, 22. септебра, у Вербаше почина 39. Фестивал фоклорних традицийох Войводини, хтори тирва три днї, по нєдзелю, 24. септембер. Медзи 98 ансамблами 26 националних заєднїцох з Войводини участвую и вецей руски шпивацки и музични ансамбли, хтори ше пласовали на тоту найвисшу смотру култури у Покраїни. Источашнє, нєшка у Вербаше почина и Дзевяти Фестивал дзецинскей жридловей тбворчосци, а збуваня провадзи и Панонски вашар.
Фестивал дзецинскей жридловей творчосци нєшка почина на 17 годзин, наступя 23 ансамбли, медзи нїма и дзецински фолклорни ансамбл Руского културного центру з Нового Саду з танцом „Облїванє”, у хореоґрафиї Владимира Ивана.
На соботу и нєдзелю, тиж на 17 годзин, буду змагательни часци Фестивалу фоклорних традицийох Войводини, кеди наступя и ансамбли з вецей наших местох.
Того року ше на Фестивалє и Панонским вашаре окреме представя националну традицию и културу Чарногорцох, так же з рижнима змистами участвую вецей чарногорски здруженя и Национални совит чарногорскей националней меншини у Сербиї, хторому шедзиско у Вербаше.
Нєшка на 19 годзин почнє културно-уметнїцка програма чарногорских здруженьох з Войводини, а на 20 годзин будзе шветочне отверанє 39. Фестивалу фоклорних традицийох. По отвераню шлїдзи цаловечарши концерт ансамблу „Даниловґрад“ з Даниловґраду, з Чарней Гори.
Програми ше отримує на площи опрез и у просторийох Центру за физичну културу „Драґо Йовович”, а уход безплатни.
