ШИД – На вчерайшей схадзки Општинскей ради (ОР) Шид принєшена одлука о розписованю конкурсох за директорох ЯКП „Водовод“ и „Стандард“, понеже дотерашнїм виходза функциї окончовательох длужносци.
Прилапени и финансийни звити и плани роботи месних заєднїцох Адашевци, Сот и Беркасово, хтори нє розпатрани на прешлей схадзки ОР, а тоти документи ма потвердзиц и Скупштина општини.
На конференциї за новинарох после схадзки ОР предсидатель Општини Предраґ Вукович бешедовал и о заключеньох Колеґиюму руководительох Општини, отриманого позавчером, а на хторим винєсол становиско же ше у општини муши вельо вецей робиц.
Як гварел Вукович, у наступних дньох ше почнє з активносцами на вирабяню проєктох за Индустрийну зону при Адашевцох, адаптованє Културно-образовного центру, вибудов водоводу у Соту, адаптованє ОШ „Сримски фронт“ и други, а за хтори обезпечени средства з висших уровньох власци.