У Бикичу єст шумне число леґиньох за женїдбу хтори ище нє упознали свою будуцу животну сопутнїцу, но заш лєм вше дахто з нїх тото животне питанє риши. Нєодлуга будзе рок як єден з нїх свою пару упознал и оженєл ше. Слово о Деянови Бобальови, предсидательови валалу и КПД „Иван Котляревски”, хтори свою Любу приведол з України.
Алє, рушиц би од початку у тей красней приповедки, од того часу кед Деян упознал свою супругу Любов, односно Любу як ю тераз волаю, зоз Закарпатскей обласци у України.
– Пред даскельо роками до України ходзели робиц нашо валалчанє Стева и Васа Гнатко, до валалу Имстичово, у општини Иршава, блїзко при Мукачове. Кед приходзели до Бикичу, бешедовали як им там, як ше знашли и цо робя, та ше и я прейґ фейсбуку заинтересовал, и цалком случайно тиж прейґ Фейсбуку упознал Любу Зейкан. Почали зме ше поряднє дописовац и контактовац. Тирвало то можебуц три тижнї, а вец Елемир Рац зоз Руского Керестура зоз супругу Ирину рушели на драгу до України, та пошол и я зоз нїма. Було то влонї у фебруару – приповеда Деян, хтори даскельо днї бул у пана Павла Чучки у Ужгородзе. Зоз Любу ше теди стретнул барз на кратко, можебуц на єдну годзину, у замку Паланок у Мукачове. Так почало.
ШИЦКО ИШЛО ЯК ПО ВОДИ
После того першого стретнуца, ушлїдзело и друге у авґусту, кед сом упознал и єй фамелию, а вец у септембру Люба пришла першираз до Бикичу дзе у нас була даскельо днї. Теди уж такповесц шицко було ришене, бо ю Деян спитал. Кед ознова у новембру пошол до України, остал кус длужей, та з Любу пошол и до Бардейова на фестивал 
„Маковицка струна”. Кажду хвильку вєдно препровадзовали, а пред Крачуном того року, точнєйше 3. януара ознова пошол до України, алє ше нє врацел сам. Приведол свою будуцу супругу до Бикичу. Вєдно ше врацели 15. януара, а 27. ше повинчали у оп штини. Люба наставнїца українского язика, у валалє дзе жила робела як вихователька.
– Имстичово ма коло 3 000 жительох, так же Бикич мали у одношеню на ньго, алє видзим же ту людзе добри, роботни и побожни. Нєт ище рок як сом ше одала, алє сом ше присподобела на живот у Бикичу. Вязана сом за фамелию и обисце, нє ходзим по сушедох, або по родизни, а помали вше вецей учим бешедовац и по сербски. Вєдно зоз Деяном сом була на фестивалу „Червена ружа” у Руским Керестуре и на „Жатви” у Коцуре. Вшелїяк же зме нє препущели анї „Културне лєто” у Шиду, поготов же нам є ту барз блїзко. Припознавам, крашнє ми у новим штредку и наздавам ше же єдного дня достанєм роботу у своїм фаху, ту у валалє – приповеда нам Люба, и пробує поровнац Бикич з валалом у хторим одросла.
У Имстичове людзе тиж вредни, роботни и барз ходза до церкви. Кед ше на улїци стретню, єдни другим здравкаю зоз Слава Исусу Христу, а нє добри дзень як ту. Кед одходза до церкви, шветочно ше пооблєкаю, а звичайно ище всоботу наваря полудзенок и за нєдзелю и напечу колачи. Нєдзеля дзень за духовносц и одпочивок.
СТЕФАНА ЗМЕ БАРЗ ЧЕКАЛИ
Окремна радосц у фамелиї Бобальових була 13. авґуста, кед им ше народзел син Стефан. З оглядом же ше концом януара повинчали у матичара, Деян и Люба церковне винчанє и источасно кресценє малого Стефана виплановали у церкви у Бикичу 6. октобра. Кумове були староста Вишного Тварожцу, Йозеф Балащак и його супруга Лидия. Бул присутни и Мирослав Буйда, началнїк Бардейовского округу, а Емил Балащак зоз Бардейова написал и окремну писню пошвецену млодятом. На винчаню и кресцинох з України пришол Любов власни брат Иван зоз свою будуцу супругу.
Найвекшу увагу Бобальово тераз пошвецели малому Стефанови.
Деян уж даскельо роки на чолє Месней заєднїци и вєдно з мацеру Невенку роби у овоцнїку дзе окрем брескиньох маю и ягоди, а занїмаю ше и зоз заградкарством, та садза гращок и капусту.
И Деян и Люба задовольни, так як як сцели так покончели, а гваря же пред собу маю вельо плани.
НЄ МОЖ ЗНАЦ
Упартосц, добра дзека и Фейсбук помогли же би ше упознали Деян и Люба. Любов гранїци нє ма, а млада пара ше наздава же можебуц ище дахто з валалу руши по їх шлїдох. Кед ше дацо укаже як добре, миле и красне, можебуц же о тим и други буду штудирац. Хто зна, можебуц же ше Бикичанє убудуце буду частейше свадзбовац.
У нащиви України