НОВИ САД – У „Службеним лїсту АП Войводини”, його двацец седмим чишлє (з датумом од 7. юния того року), обавени и ришеня Покраїнскей влади о розришеню дотерашнього и менованю нового Управного одбору Заводу за културу войводянских Руснацох (УО ЗКВР).
Ришеня о розришеню дотерашнього и менованю нового УО ЗКВР Покраїнска влада, як соснователь и главни финансиєр Заводу, принєсла на предкладанє другого соснователя – Националного совиту Руснацох, после схадзки Совиту отриманей 18. мая, на хторей за дзевец членох УО Заводу предложени 12 кандидати.
Спомедзи предложених, на мандат од штири роки Покраїнска влада за предсидателя УО ЗКВР меновала Миломира Шайтоша з Нового Саду, а за членох УО Мирослава Чакана з Дюрдьова, Миряну Дєкич з Нового Саду, Ґабриєлу Саянкович з Руского Керестура, Весну Раґаї Цап з Коцура, Далибора Болдиша зоз Шиду, др Йоакима Стрибера з Беоґраду, Наташу Макаї Мудрох зоз Сримскей Каменїци и Борислава Сакача з Нового Саду.
Пред менованьом нового, з членства у УО ЗКВР Покраїнска влада розришела Анамарию Регак (дотерашню предсидательку УО) з Нового Саду, Любицу Отич з Дюрдьова, Сашу Сабадоша зоз Зомбора, др Йоакима Стрибера з Беоґраду, Ивана Канюха з Нового Саду, Лидию Пашо з Руского Керестура, др Деяна Загорянския з Вербасу, Дюру Виная з Нового Саду и Михаила Римара з Петроварадину.
Як дознава Рутенпрес, можлїве же конститутивна и перша порядна схадзка УО ЗКВР будзе концом того, лєбо початком идуцого тижня.