РУСКИ КЕРЕСТУР – З добродзечну роботну акцию, пияток 15. юния, котру орґанизовал Месни одбор Сербскей напредней странки (СНС) и Месна заєднїца Руски Керестур, валалски базен порихтани за наступну сезону и посадзени 200 млади древка на дакедишнєй дзивей депониї при теметове.
На роботней акциї на базену очисцени базен за наиходзацу сезону купаня, попри тим волонтере офарбели циви на драбинкох и огради, та и лавочки, а заменєни и поламани дещички.
У роботней акциї участвовали школяре седмей и осмей класи основней школи „Петро Кузмяк”, Добродзечне огньогасне дружтво Руски Керестур, роботнїки ЯКП „Руском” котри покошели траву и позберали шмеце, члени Месних одборох СНС зоз Руского Керестура и з других местох општини.
У рамикох истей роботней акциї, Здруженє спортских рибарох „Коляк”, Здруженє конїцкого клубу „Русин” и члени Церковного одбору садзели древка на розчисценей нєлеґалней депониї при валалскому теметове.
Посадзени 200 младнїки павловниї котри подаровало Коцурске здруженє младих „КУМ”, а шицко у рамикох „Желєней школи” цо заєднїцки проєкт Реґионалного еколоґийного центру и Розвойней аґенциї Австриї. Значну потримовку тей акциї дало и локалне подприємство „Т-пам” котре подаровало залївну систему „капка по капку” за новопосадзени древка.
По законченю, за шицких учашнїкох бул орґанизовани полудзенок у лєтнїковцу ЗСР „Коляк” на базену.