НОВИ САД – У орґанизациї Одбору за образованє Националного совиту Руснацох вчера, 1. юния, отримане Седме стретнуце предшколских дзецох руских оддзелєньох з наших местох.
Як и потераз, циль того стретнуца бул же би ше раз у року на єдним месце позберало шицки руски дзеци. На тот завод до Нового Саду припутовали штерацецеро дзеци зоз Руского Керестура (19) хторих приведла вихователька Емилия Костич, зоз Коцура (10), а приведли их виховательки Ксения Уйфалуши и Марина Штрбац, и зоз Дюрдьова (10) хтори приведла вихователька Марина Сабадош.
Дзеци ше дружели и упознавали перше у дзецинским парку у Петроварадину, а потим ше випендрали и на Петроварадинску твердиню одкаль ше могли припатрац на цали Нови Сад.
Як надпомла Мелания Римар, предсидателька Одбору за образованє Националного совиту Руснацох, таки файти друженя дзецох буду и убудуце отримовани, насампредз прето же шицки тоти дзеци потенциялни школяре у руских оддзелєньох.
Потераз таки файти друженьох були отримовани у оводох по наших местох, кед дзеци зоз своїма виховательками пририхтовали кратки и пригодни програми. З тей нагоди заварти простор оводох заменєни за бависко на отвореним, як же нагадовал же од єшенї мали рапухи свойо оводарски карсцелїки заменя за школски лавки.
