НОВИ САД – Вчера, после пребуваня у Бечу, у Австриї, до „Руского слова” у Новим Садзе, сцигол вифлеємски огень хторого штварти рок, вше у децембру, ту приноша представителє Скаутскей орґанизациї „Пластуни” зоз Закарпатя у України.
Скаутох провадзел о. Михайло Шанта, а вони гварели же им мило же пришли и же жадаю щешлїве Рождество Христово, у мире, радосци и любови. Були Ростислав Добош, Андри Ребрик, Василь Карабин и Иван Гоманюк. Тот огень у запалєней швички зоз Вифлеєму з места Исусового народзеня ше розноши по велїх жемох Европи. Вирни го превжали зоз своїма швичками.
После пребуваня у „Руским слове”, скаути одпутовали до Румуниї, а вифлеємски огень до других парохийох пренєше о. Шанта.
