БЕОҐРАД – Термин за придаванє вимоги за субвенционованє купованя нового трактора предлужени по 31. мая, сообщене вчера з Министерства польопривреди и защити животного штредку.
Першобутни термин за придаванє вимоги за субвенцию за купованє нового трактора у тим року бул по 19. май, а подношенє вимогох почало 10. априла. Вимогу мож придац и на Медзинародним польопривредним сайме у Новим Садзе, хтори тирва по 19. май.
Информациї о розписаней явней поволанки за тоту намену кажди роботни дзень од 7,30 до 15,30 г. мож достац на числа телефонох Инфо-центру Министерства польопривреди и защити животного штредку – 011/260-79-60 и 011/260-79-61, як и у Контакт-центру Управи за аґрарни плаценя – 011/30-20-100; 011/30-20-101 и 011/30-20-118.