БЕОҐРАД – Министерство польопривреди сообщело же польопривреднїки шлїдуюци два роки ошлєбодзени од обнавяня реґистрациї польопривредного ґаздовства, кед же у ґаздовствох нє було даяки пременки, односно вименки податкох хтори нє уписани до Реґистру польопривредних ґаздовствох.
Так того, 2017. и нарок, 2018. року, польопривреднїки котри уж од скорей уписани до Реґистру, нє муша обнавяц реґистрацию ґаздовства.
Кед пришло до даяких пременкох у польопривредним ґаздовстве, польопривреднїки вименєни податки длужни приявиц до своєй филияли Управи за трезор у чаше од 30 днї од дня пременки.
Як гварел директор Управи за аґрарни плаценя Жарко Радат, з тоту одлуку Министерство олєгчало польопривреднїком, котри дотераз кажди рок мушели виполньовац велї формулари и чекац у Управи за трезор, а нє мали сущни пременки у польопривредним ґаздовстве.
Польопривреднїки котри ше перши раз уписую до Реґистру польопривредних ґаздовствох, то можу окончиц през цали рок у своїх филиялох Управи за трезор.
И перши раз реґистровани здобуваю право на субвенциї, як и польопривредни ґаздовства хтори уж реґистровани.
Вецей информациї о реґистрациї польопривредного ґаздовства мож достац прейґ Контакт-центру Управи за аґрарни плаценя, на тел. 011/30-20-100 и 30-20-101.