РУСКИ КЕРЕСТУР – Вирни рускокерестурскей парохиї св. оца Миколая вчера преславели найвекше Марийово швето – Вельку Матку Божу, а найсвяточнєйше було на велькей Служби Божей на 10 годзин у Водици.
Службу служел госц зоз Канади, по походзеню Керестурец о. Янко Колошняї котри и наказовал, а троме домашнї священїки – парох о. Михайло Малацко, и капеланє о. Владимир Медєши и о. Михайло Шанта споведали, и на концу вєдно служели Молебен до Богородици з котрим закончене богослуженє пред водицову Лурдеску пещеру.
О. Колошняї у казанї наглашел старанє Пречистей Дїви Мариї за каждого чловека, а єй одход зоз жемского живота хтори ше преславює зоз тим шветом, надїя на вични живот и шицким людзом.
На Служби Божей було вельке число присутних, а попри домашнїх, як и вше, и госцох хтори ту на одпочивку з других державох и обовязно нащивюю и Водицу.