НОВИ САД – На концу 2016. року у Сербиї було 700 000 нєзанятих, спомедзи котрих 160 556 з Войводини. Медзитим, як указую статистики, у трецим кварталу 2016. року у Войводини було 514 397 занятих, цо за 1,3 одсто вецей у одношеню на исти период 2015. року.
Вецей як половка нєзанятих особи у найпродуктивнєйших рокох – од 30 до 54 роки, пише „Дневник”, а у Войводини найвекши процент нєзанятих творя особи старосней структури од 50 до 54 роки – 12,3 одсто.
На евиденциї Националней служби за обезпечованє роботи єст 9,5 одсто младих од 20 до 24 роки; 3,1 одсто младих од 15 до 19 роки, а найстаршей популациї – од 60 до 64 роки, на евиденциї Служби єст 5,8 одсто.
На концу 2016. року медзи нєзанятима було аж 61 835 (38,5 одсто) особи котри нєфахови, док найвецей – 98 721 особи (61,5 одсто) мали розлични ступень фаховосци.