РУСКИ КЕРЕСТУР – Остатнї днї, окреме пополаднями, паркинґи коло крижней драги у центре Руского Керестура барз позаберани з рижнима комбиями и велькима терховнима камионами, хтори ту чекаю же би познєйше свойо превозки наполнєли з паприґу, а дополадня на паркинґох вецей автобуси и комбиї хтори з рижних местох привожа наднїчарох оберац паприґу.
Фотоґрафиї хтори обявюєме настали вчера после 15 годзин, дзе видно парковани превозки накупцох паприґи з рижнима реґистрациями, найвецей з беоґрадскима, та з местох у Сербиї за Беоґрадом, алє и з Войводини и Босней, як и камиони вецей фирмох хтори орґанизовано одкупюю паприґу у Керестуре.
Пре їх вельке число у самим центре транспорт за вожачох и пешакох барз очежани, бо од нїх нє видно виходи на главну драгу и нїхто то нє реґулує, а паркинґи звичайно розтерховани познєйше пополадню и ґу вечару, кеди ше накупци селя на валалски улїци пре купованє паприґи, а камиони на орґанизовани места за одкуп.
Понеже ше у валалє зявели и накупци, цена паприґи тераз поросла, та ше першу класу на одкупних местох предава по 45, другу по 30 динари за кґ, а накупци паприґу плаца од 40 до 45 динари, дознава Рутенпрес од паприґарох.
Поглєдованє за паприґу з каждим дньом рошнє, гваря паприґаре, та ше наздаваю и пороснуцу цени, алє ше обаваю и же пошвидко у валалє нє будзе паприґи на предай.
