КОШИЦЕ (СЛОВАЦКА) – У финалим змаганю популарней ТВ-емисиї „Жем шпива” у Словацкей, тей соботи, 8. априла, медзи дзешец точками аж пейц буду з восточней Словацкей, та як пише портал новинох „Корзар”, а преноши русинФОРУМ – „за потїху тота абсолутна виходнярска доминация”.
Прешлей соботи, у полуфиналу того ТВ-шоуа найвецей гласи жирия и публики по ес-ем-ес порукох достал Русински трио (як є приявени за змаганє), хтори творя шпивачки Доминика Новотна зоз Снїни, Симона Морозова з Рускей Поруби и Доминика Сакмарова зоз Спишкого Пограду, а шицки три жию у Кошицох. Участвовали зоз свадзебнима шпиванками зоз Шамброну.
Пласман до финалу всоботу виборела и фолклорна ґрупа „Раславичан” з Раславици, хтроа постої уж 85 роки, а змагали ше зоз горньошаришскима танцами.
Тиж так, пласман до ютрейшого финалу прешлей соботи виборел и танєчнїк Петер Вайда з Кошицох, член фолкнорней ґрупи „Борєвка”, з ромским танцом зоз Сечовей Полянки и танєчнима мотивами зоз Парховянох.
Попри спомнутих, учасц у ютрейшим финалним змаганю у ТВ-емисиї „Жем шпива” ище скорей виборели Штефан Штец и дзецинска танєчна ґрупа „Шафолка” зоз Смижяну, та як гварел продуцент популаного шоуа Петер Нунєз – потвердзело ше же восточна Словацка жридло фолклору.